Kama unamjua jamani,
Kanisailie kwa nini
Mbona na mimi haneni,
na mwendoye sina sinani
Nachotaka ni hisani,
walahi sina kisirani
Nataka awe mwendani,
iwapo n'tapawa idhini
Zangu n’tetesi za mtima,
zan’tatiza hadi kusema
zanipa nyingi nakama,
na kupoka yangu naima
Anavyofanya si vyema,
kamuelezeni kwa hima
Kwamba ninaaengema,
na inaniisha neema
Kama ujumbe metuma,
ni kama kadinda kusoma
Kama sivyo angesema,
pengine naye akatuma
Kwa tuo ningesoma,
niyajue anayosema
Nijue kama ni kwema,
‘kajiamulie mapema
Nimeamba yote Nzisa,
sinayo mengine kwa sasa
lau kije kuwa kisa,
niliyemtaka nikakosa
Wala sinambe siasa,
ninaatilika kabisa
Ukimuona angusa,
na usiipoteze ruksa
Umwambie aitike,
si vyema akaniteleke,
Kwenye laini umweke,
ulainishe moyo wake
Macho yake afunguke,
na mtima wake uamke
Akubali miye wake,
aliye laazizi wake
N’ mema yenu maitiko,
ni heri kusema kuliko
Ila hayan’tui mtwiko,
wala yakanipa kiteko
Kan’tafutie aliko,
kamweleze hapa niliko
Sinacho mimi kicheko,
ni machozi ya mtiririko
Kweli hun’pati Rahabu,
unahitaji na hesabu
Kuyajua haya babu,
nimuambiayo habubu
Alejigeuza bubu,
hasikii wala hajibu
nafuu ja angejibu,
hata kwa ishara ni jibu
Haoni nivyostahabu,
na kungoja kama bawabu
Angaa nipate jibu,
jawabu litalonitibu,
H’jui kiburi harabu,
huua wala hakitibu
Hivyo mwambie sababu,
na kiini cha kunijibu
Comments